கனடாவின் பிரிட்டிஷ் கொலம்பியா மாகாணத்திலுள்ள வன்கூவர் நகரில் வீடற்ற மக்கள் வீதிகளில் நடந்து சென்று கொண்டிருந்தனர். அப்போது அவர்களை நோக்கி மர்ம நபர் துப்பாக்கியால் சுட்டார். இதில் பொதுமக்கள் அலறியடித்து ஓடினார்கள். ஆனால் மர்ம நபர் சுட்டதில் சிலர் குண்டு பாய்ந்து கீழே விழுந்தனர். தகவல் அறிந்ததும் பொலிசார் சம்பவ இடத்துக்கு வந்தனர். அப்போது பொலிசாரை நோக்கி மர்ம நபர் தாக்குதல் நடத்தினார். இதையடுத்து அவரை பொலிசார் சுட்டுக் கொன்றனர்.
மர்ம நபர் துப்பாக்கியால் சுட்டதில் 2 பேர் பலியானார்கள். படுகாயமடைந்த 2 பேரை மீட்டு மருத்துவமனையில் சேர்த்தனர். மர்ம நபர் குறித்த விபரங்களையும், துப்பாக்கி சூட்டுக்கான காரணத்தையும் பொலிசார் வெளியிட வில்லை.
இது தொடர்பாக பொலிஸ் தலைமை அதிகாரி காலிப் பயானி கூறும்போது, துப்பாக்கி சூட்டுக்கான காரணம் குறித்து விசாரித்து வருகிறோம். துப்பாக்கி சூடு நடத்தியவருக்கும் பலியானவர்களுக்கும் ஏதாவது தொடர்பு இருந்ததா என்பது குறித்து தெரியவில்லை. ஆண் ஒருவருக்கு காலில் காயம் ஏற்பட்டுள்ளது. பெண் ஒருவர் ஆபத்தான நிலையில் சிகிச்சை பெற்று வருகிறார் என்றார்.
Reported by :Maria.S