எரிபொருளுக்காக வரிசையில் நின்ற தனியார் பேருந்தின் கீழ் இறங்கி நிலத்தில் அமர்ந்திருந்த பயணி, சாரதியின் கவனக்குறைவால் பேருந்தின் டயர் ஏறி உயிரிழந்துள்ளார்.
புன்னாலைக்கட்டுவன் எரிபொருள் நிரப்பு நிலையத்தில், நடைபெற்ற இந்தச் சம்பவத்தில் ஊரெழு கிழக்கைச் சேர்ந்த தர்மலிங்கம் சதீஸ் ( வயது 37 ) என்பவரே உயிரிழந்தார்.சம்பவம் தொடர்பில் மேலும் தெரியவருவதாவது,
உயிரிழந்த பயணி யாழில் இருந்து வசாவிளான் நோக்கி பேருந்தில் பயணித்துள்ளார். பயணத்தின் போது, பேருந்தில் தூங்கியமையால், வசாவிளானில் இறங்கவில்லை . பேருந்து நடத்துனரும், அதைக் கவனிக்கவில்லை
அவர் மீண்டும் வசாவிளான் செல்வதற்காக யாழ்ப்பாணம் நோக்கி மீண்டும் பேருந்தில் பயணித்த போது , புன்னாலைக்கட்டுவனில் உள்ள எரிபொருள் நிரப்பு நிலையத்தில் டீசலுக்காக வரிசையில் பேருந்து காத்திருந்துள்ளது. அதன் போது , குறித்த பயணி பேருந்தில் இருந்து கீழே இறங்கி நிலத்தில் அமர்ந்திருந்துள்ளார் . அதனை அவதானிக்காத சாரதி பேருந்தை எடுத்த போது பயணி மீது பேருந்து ஏறியுள்ளது. இதையடுத்து பயணி சம்பவ இடத்திலேயே உயிரிழந்துள்ளார். பேருந்து சாரதி அங்கிருந்து தலைமறைவாகியுள்ளார். சம்பவம் தொடர்பில் பொலிஸார் விசாரணைகளை முன்னெடுத்துள்ளனர்.
Reported by : Sisil.L