CINEMA

80களின் நாயகன் நடிகர் சக்கரவர்த்தி காலமானார்

K.S.KARAN — Sat, 23 Apr 2022 13:02:25 +0000

1980களில் பிரபலமாக இருந்த பிரபல நடிகர் சக்கரவர்த்தி மாரடைப்பால் இன்று மரணமடைந்துள்ளதாகத் தெரிவிக்கப்படுகிறது.தமிழ் திரையுலகில் சிவாஜி, ரஜினி, கமல் என முன்னணி நடிகர்களின் படங்களில் நடித்ததன் மூலம் பிரபலமான சக்ரவர்த்தி இன்று (ஏப்ரல் 23) காலை மும்பையில் காலமானார். அவருக்கு வயது 62.

கடந்த 1970 மற்றும் 80களில் அதிகமான தமிழ்ப் படங்களில் சக்ரவர்த்தி நடித்துள்ளார். இதுவரை 80 திரைப்படங்களில் அவர் நடித்துள்ளதாகக் கூறப்படுகிறது. ரிஷி மூலம், ஆறிலிருந்து அறுபது வரை, முள்ளில்லாத ரோஜா உள்ளிட்ட ஏராளமான தமிழ் படங்களில் நடித்துள்ளார்.

சிகப்பு ரோஜாக்கள் படத்தில் நடிகை வடிவுக்கரசியின் அண்ணனாக சிறு வேடத்தில் நடித்தார் சக்கரவர்த்தி. தொடர்ந்து ரஜினியின் கிளாசிக் படமான ‘ஆறிலிருந்து அறுபது வரை’ படத்தில் தம்பியாக நடித்தார். ‘ரிஷி மூலம்’ படத்தில் சிவாஜி கணேசனுடன் இணைந்து நடித்து தனது அழுத்தமான நடிப்பால் ரசிகர்களைக் கவர்ந்தார். ‘முள்ளில்லாத ரோஜா’ படத்தில் வாய் பேச முடியாதவராக நடித்து அசத்தினார்.

தர்ம யுத்தம்’, தூக்கு மேடை’, ‘கொட்டு முரசே’, ‘உதயகீதம்’, ‘புதிய பயணம்’, ‘இதயம் தேடும் உதயம்’, ‘முள்ளில்லாத ரோஜா’, ‘ராஜாதி ராஜா’ உள்ளிட்ட பல படங்களில் நடித்தார்.

70களின் இறுதியில் தொடங்கி 80கள் கடைசி வரை கிட்டத்தட்ட 100 படங்களில் சிவாஜி, ரஜினி, கமல், சிவகுமார் உள்ளிட்ட நடிகர்களின் படங்களில் அண்ணன், மகன், நண்பன் என பல்வேறு விதமான குணச்சித்திர வேடங்களில் நடித்துள்ளார். ஓரிரு படங்களில் ஹீரோவாகவும் நடித்துள்ளார்.

சினிமாவிலிருந்து விலகிய சக்கரவர்த்தி மும்பையில் குடும்பத்துடன் வசித்து வந்தார். தனியார் தொலைக்காட்சியில் பின்னணிக் குரல் கொடுக்கும் கலைஞராக அவர் இருந்து வந்துள்ளார் என்பது குறிப்பிடத்தக்கது.

சக்கரவர்த்திக்கு இரண்டு மகன்கள் உள்ளனர். இந்த நிலையில் சக்கரவர்த்தியின் மறைவுக்கு திரையுலகப் பிரபலங்கள் மற்றும் ரசிகர்கள் இரங்கல் தெரிவித்து வருகின்றனர்.
————-
Reported by : Sisil.L

The post 80களின் நாயகன் நடிகர் சக்கரவர்த்தி காலமானார் appeared first on Vanakkam News.

பிரபல நடன இயக்குநர் சிவசங்கர் காலமானார்

K.S.KARAN — Mon, 29 Nov 2021 04:18:54 +0000

கொரோனா தொற்றால் பாதிக்கப்பட்டு கடந்த 10 நாட்களுக்கும் மேலாக ஹைதராபாத்தில் தனியார் மருத்துவமனையில் சிகிச்சை பெற்று வந்த நடன இயக்குநர் சிவசங்கர் சிகிச்சை பலனின்றி காலமானார். உயிரிழக்கும் போது அவருக்கு 72 வயது.

தேசிய விருது பெற்ற நடன இயக்குநர் சிவசங்கர் மாஸ்டர் தமிழ், தெலுங்கு, இந்தி உள்ளிட்ட 10 க்கும் மேற்பட்ட மொழிகளில் 800க்கும் மேற்பட்ட படங்களுக்கு நடன இயக்குநராக பணியாற்றியுள்ளார்.

தமிழில் வரலாறு, பரதேசி, தானா சேர்ந்த கூட்டம் , சர்கார் உள்ளிட்ட பல படங்களிலும் முக்கிய கதாபாத்திரங்களை ஏற்று நடித்துள்ளார்.

இவருக்கு பூவே உனக்காக படத்தில் நடன இயக்குநராக பணியாற்றிய மைக்காக தமிழக அரசின் விருதும் வழங்கப்பட்டது. மகதீரா படத்திற்கு தேசிய விருது பெற்றார். பாகுபலி உள்ளிட்ட பிரபல பாடல்களுக்காக இவர் நடனம் அமைத்துக் கொடுத்துள்ளார்.

சிவசங்கர் 1948 ஆம் ஆண்டு டிசம்பர் 7ஆம் திகதி பிறந்தவர் என்பது குறிப்பிடத்தக்கது.

Reported by : Sisil.L

The post பிரபல நடன இயக்குநர் சிவசங்கர் காலமானார் appeared first on Vanakkam News.

புனித் ராஜ்குமாரின் கண்களால் 4 பேருக்கு பார்வை கிடைத்தது

K.S.KARAN — Tue, 02 Nov 2021 13:35:18 +0000

மாரடைப்பு காரணமாக மறைந்த கன்னட நடிகர் புனித் ராஜ்குமாரின் இரண்டு கண்கள் மூலமாக நான்கு பேருக்கு பார்வை கிடைத்துள்ளது.
தனது பெற்றோரைப் போலவே புனித் ராஜ்குமாரும் தனது கண்களைத் தானம் செய்திருந்தார்.

புனித்தின் கண்களை தானமாகப் பெற்ற மருத்துவர்கள், அதன் மூலம் நான்கு பேருக்கு பார்வை கிடைக்க வழி செய்துள்ளனர். விழிப்படலத்தின் முன்பகுதி, பின்பகுதியை தனித்தனியாக பிரித்து நவீன தொழில்நுட்பம் மூலமாக அறுவை சிகிச்சை செய்து நால்வருக்கு பொருத்தியுள்ளதாக மருத்துவர்கள் தெரிவித்துள்ளனர்.

கர்நாடகாவைச் சேர்ந்த இளம் வயதினர் இதன் மூலம் பயனடைந்துள்ளதாகத் தகவல் வெளியாகியுள்ளது.
——————

Reported by : Sisil.L

The post புனித் ராஜ்குமாரின் கண்களால் 4 பேருக்கு பார்வை கிடைத்தது
appeared first on Vanakkam News.

பிரபல கர்நாடக இசைக்கலைஞர் லண்டனில் காலமானார்

K.S.KARAN — Tue, 02 Nov 2021 13:30:48 +0000

லண்டனில் பிரபல கர்நாடக இசைக் கலைஞராகத் திகழ்ந்த திருமதி சிவசக்தி சிவநேசன் நேற்று முன்தினம் காலமானார்.

லண்டன் பாரதிய வித்ய பவனில் மூன்று தசாப்தங்களுக்கு மேலாக வாய்ப்பாட்டு, வீணை
ஆசிரியையாகத் திகழ்ந்த இலங்கையரான சிவசக்தி, லண்டனில் அதிகளவு மாணவ மாணவிகளை வாய்ப்பாட்டிலும் வீணையிலும் அரங்கேற்றியவர்.
இவர்களில் சிலர் இத்துறைகளில் உன்னத ஆற்றல் பெற்றுத் திகழ்வது குறிப்பிடத்தக்கது.

பாரதிய வித்ய பவனின் பரதநாட்டிய நிகழ்ச்சிகளில் சிவசக்தியின் பாட்டு தனியான இடத்தைப் பெற்றது.

‘வாணி பைன் ஆர்ட்ஸ்’ என்ற நிறுவனத்தையும் சிவசக்தி தனது கணவர் சிவநேசனுடன் நிர்வகித்து வந்தார்.
யாழ்ப்பாணம் என். வீரமணி ஐயரின் மாணவியான சிவசக்தி, வீரமணி ஐயரின் ஆக்கங்கள் அனைத்தை யும்
பிரசுரிப் பதில் எடுத்த முயற்சி பெரிதானது.

வீரமணி ஐயரின் கீர்த்தனைகளை மேடைகளில் பிரபலமடையச் செய்வதிலும் அவர் பெரும் அக்கறை
கொண்டிருந்தார்.

பல நற்பணிகளுக்கான நிதி உதவியிலும் அவர் துணை புரிந்தார்.

யாழ்ப்பாணம் இராமநாதன் நுண்கலைக் கல்லூரியிலும் பணியாற்றிய சிவசக்திக்கு வயது 64 ஆகும்.
————————
Reported by : Sisil.L

The post பிரபல கர்நாடக இசைக்கலைஞர் லண்டனில் காலமானார் appeared first on Vanakkam News.

நடிகை ‘நல்லெண்ணெய் சித்ரா’ காலமானார்

K.S.KARAN — Sat, 21 Aug 2021 12:32:30 +0000

பிரபல நடிகையான நல்லெண்ணெய் சித்ரா மாரடைப்பால் காலமானார். தமிழ் சினிமாவில் 80-களின் காலகட்டத்தில் புகழ்பெற்ற நடிகையாக திகழ்ந்தவர் சித்ரா. இவர் சரத்குமார் நடிப்பில் வெளியான ‘சேரன் பாண்டியன்’ படத்தில் தங்கையாக நடித்த பிறகு மிகவும் பிரபலமானார்.

இவர் ஒரு நல்லெண்ணெய் விளம்பரத்தில் நடித்ததை அடுத்து, நல்லெண்ணெய் சித்ராவாகவே கோலிவுட்டில் அடையாளப்படுத்தப்பட்டார். சித்ரா தமிழ், தெலுங்கு, மலையாளம், ஹிந்தி என 300க்கும் மேற்பட்ட படங்களில் நடித்துள்ளார். திருமணத்துக்குப் பிறகும் தொடர்ந்து சினிமா, சீரியல்களில் நடித்து வந்தார்.
இந்நிலையில், சென்னையில் கணவர் மற்றும் மகளுடன் வசித்து வந்த சித்ரா இன்று மாரடைப்பால் திடீரென மரணம் அடைந்திருக்கிறார். சித்ராவின் திடீர் மரணத்தால் திரையுலகத்தினர், ரசிகர்கள் சோகத்தில் ஆழ்ந்துள்ளனர்.
———————-

Reported by : Sisil.L

The post நடிகை ‘நல்லெண்ணெய் சித்ரா’ காலமானார் appeared first on Vanakkam News.

பிக் பாஸ் அர்ச்சனாவுக்கு மூளையில் திடீர் அறுவைச் சிகிச்சை!

K.S.KARAN — Sat, 10 Jul 2021 12:52:48 +0000

பிக் பாஸ் புகழ் அர்ச்சனாவுக்கு மூளையில் இன்று அறுவைச் சிகிச்சை நடப்பதாக அவரே இன்ஸ்டாகிராமில் அறிவித்துள்ளார். பிக்பாஸ் நான்காம் சீசனில் போட்டியாளராக கலந்து கொண்டவர் அர்ச்சனா. அதற்கு முன்பு ஸீ தமிழ் தொலைக்காட்சியில் முன்னணி தொகுப்பாளராக இருந்து வந்தார். பிக் பாஸுக்கு பிறகு விஜய் டிவியிலேயே நிகழ்ச்சிகளை தொகுத்து வழங்க ஆரம்பித்தார். தற்போது அவர் சில முக்கிய ஷோக்களை தொகுத்து வழங்கி வருகிறார். இந்நிலையில் அர்ச்சனா தான் மருத்துவமனையில் அனுமதிக்கப்பட்டு இருப்பதாகவும், மூளையில் அறுவைச் சிகிச்சை நடைபெறப் போவதாகவும் தெரிவித்திருந்தார்.

அவரது மூளையில் Cerebrospinal fluid leak இருப்பதால், அதற்காக re-construction அறுவைச் சிகிச்சை இன்று(10) காலை 7 மணி முதல் 11 மணி வரை நடைபெற்றது. மேலும் ஒரு வாரம் அவர் மருத்துவமனையில் தான் இருக்கவேண்டும் என மருத்துவர்கள் தெரிவித்து உள்ளார்களாம்.

இதில் இருந்தும் மீண்டு வருவேன் என்றும், இதற்காக ஒரு சின்ன பிரேக் எடுத்துக்கொள்கிறேன் என்றும் ரசிகர்களிடம் கூறும் வகையில் அர்ச்சனா பதிவிட்டுள்ளார்.
————–
Reported by : Sisil.L

The post பிக் பாஸ் அர்ச்சனாவுக்கு மூளையில் திடீர் அறுவைச் சிகிச்சை! appeared first on Vanakkam News.

மோகன்லாலுடன் மீண்டும் இணையும் மீனா

K.S.KARAN — Mon, 21 Jun 2021 09:59:31 +0000

நடிகை மீனா ஏற்கனவே திரிஷ்யம் 1, 2 ஆகிய படங்களில் மோகன்லாலுக்கு ஜோடியாக நடித்திருந்தார் என்பது குறிப்பிடத்தக்கது.

மலையாள நடிகர் பிரித்விராஜ், சினிமாவில் நடிகராகும் முன்பு, இணை இயக்குநராக பணிபுரிந்தவர். இவர் கடந்த 2019ஆம் ஆண்டு வெளியான லூசிபர் படத்தின் மூலம் இயக்குனராக அறிமுகமானார். மோகன்லால் நடித்திருந்த இப்படம் பிளாக்பஸ்டர் ஹிட்டானது. இதையடுத்து இப்படத்தின் இரண்டாம் பாகத்தை எடுக்கும் முயற்சியில் இறங்கினார் பிரித்விராஜ். கொரோனா அச்சுறுத்தல் காரணமாக அப்படத்தின் பணிகள் தொடங்கப்படாமல் உள்ளன.

இதனிடையே, மோகன்லால் – பிரித்விராஜ் கூட்டணி ‘ப்ரோ டாடி’ படத்தின் மூலம் மீண்டும் இணைய உள்ளது. பிரித்விராஜ் இயக்கத்தில் உருவாகும் இரண்டாவது படமாக இது அமைந்துள்ளது. குடும்பப் பின்னணி கொண்ட கதையாக உருவாகும் இந்தப் படத்தை அண்டனி பெரும்பாவூர் தயாரிக்கவுள்ளார்.

இந்நிலையில், இப்படத்தில் நடிகை மீனாவும் முக்கிய கதாபாத்திரத்தில் நடிக்க உள்ளார். நடிகை மீனா ஏற்கனவே திரிஷ்யம் 1, 2 ஆகிய படங்களில் மோகன்லாலுக்கு ஜோடியாக நடித்திருந்தார் என்பது குறிப்பிடத்தக்கது.
———-
Reported by : Sisil.L

The post மோகன்லாலுடன் மீண்டும் இணையும் மீனா appeared first on Vanakkam News.

கிரிக்கெட் விளையாடி அசத்திய யோகி பாபு

K.S.KARAN — Sun, 20 Jun 2021 13:39:54 +0000

காமெடி நடிகராகவும் கதாநாயகனாகவும் வலம் வரும் யோகிபாபு தனது சமூக வலைதளப் பக்கத்தில் கிரிக்கெட் விளையாடும் வீடியோவை பதிவு செய்திருக்கிறார்.

தமிழ்த் திரையுலகில் முன்னணி காமெடி கதாநாயகனாக வலம் வருபவர் யோகி பாபு. இவர் விஜய், அஜித், சிவகார்த்திகேயன் போன்ற பல டொப் ஹீரோக்களின் படங்களில் நடித்துள்ளார். மேலும் இவர் சில திரைப்படங்களில் கதாநாயகனாகவும் நடித்துள்ளார். சமீபத்தில் இவர் நடிப்பில் வெளியான ‘மண்டேலா’ திரைப்படம் ரசிகர்களிடையே நல்ல வரவேற்பை பெற்றது.

தற்போது நடிகர் யோகிபாபு அரண்மனை-3, கடைசி விவசாயி, டிக்கிலோனா உள்ளிட்ட பல திரைப்படங்களை கைவசம் வைத்துள்ளார். இந்நிலையில் நடிகர் யோகிபாபு கிரிக்கெட் விளையாடும் வீடியோ ஒன்றை தனது சமூக வலைதளப் பக்கத்தில் வெளியிட்டுள்ளார். இந்த வீடியோ ரசிகர்களை கவர்ந்து வைரலாகி வருகிறது.
—————-
Reported by : Sisil.L

The post கிரிக்கெட் விளையாடி அசத்திய யோகி பாபு appeared first on Vanakkam News.

விவாகரத்துக்குப் பிறகு திருமண நாளில் ஒன்று சேர்ந்த ரஞ்சித் – பிரியா ராமன்

K.S.KARAN — Sat, 19 Jun 2021 13:17:44 +0000

திரைப்படங்களில் ஒன்றாக நடித்து சின்னத்திரையில் வெவ்வேறு சீரியல்களில் நடித்து வரும் ரஞ்சித், பிரியாராமன் இருவரும் திருமண நாளில் ஒன்று சேர்ந்திருக்கிறார்கள்.

நேசம் புதுசு திரைப்படத்தில் ஜோடியாக நடித்த ரஞ்சித் மற்றும் பிரியா ராமன் இருவரும் காதலித்து திருமணம் செய்து கொண்டனர். ஆனால் கருத்து வேறுபாடு ஏற்பட்டு இருவரும் விவாகரத்து பெற்று பல வருடங்களாக தனியாக வாழ்ந்து வந்தனர். தற்போது, இருவரும் நிறைய சின்னத்திரை தொடர்களில் நடித்து வருகின்றனர்.

இந்நிலையில் இவர்கள் இருவரும் தங்களது திருமண நாளை முன்னிட்டு சமூக வலைத் தளங்களில் ஒன்றாக எடுத்துக் கொண்ட புகைப்படத்தை பதிவு செய்து மாறி மாறி இருவரும் வாழ்த்துக்களை கூறிக் கொண்டுள்ளனர். திருமண நாளில் ஒன்று சேர்ந்த இந்த ஜோடியை பலரும் வாழ்த்தி வருகின்றனர்.

Reported by : Sisil.L

The post விவாகரத்துக்குப் பிறகு திருமண நாளில் ஒன்று சேர்ந்த ரஞ்சித் – பிரியா ராமன் appeared first on Vanakkam News.

வெப் தொடர்களில் நடிக்க ஆர்வம் காட்டும் நடிகைகள்

K.S.KARAN — Tue, 15 Jun 2021 12:24:09 +0000

நடிகைகள் திரிஷா, ஹன்சிகா, சுருதிஹாசன், அனுஷ்கா ஆகியோர் வெப் தொடர்களில் நடிக்க கதை கேட்டு வருவதாகக் கூறப்படுகிறது. கொரோனா சினிமாத் துறையை முடக்கி உள்ளதால், ஓ.டி.டி. தளங்களில் வெளியாகும் வெப் தொடர்களுக்கு மவுசு கூடி உள்ளது. இந்தத் தொடர்கள் திரைப்படங்களைப்போல் காதல், ஆக்‌ஷன், மர்மம், பிரம்மாண்டம் என்று ரசிகர்களை ஈர்க்கும் வகையில் இருப்பதாக பாராட்டுகள் கிடைத்துள்ளன.

இதில் நடிக்கும் நடிகர் நடிகைகளுக்கு சினிமாவை விட அதிக சம்பளம் கொடுக்கப்படுகிறது. சமீபத்தில் நடிகை சமந்தா நடிப்பில் வெளியான ‘தி பேமிலி மேன் 2’ வெப் தொடருக்கு நல்ல வரவேற்பு கிடைத்தது. இந்தத் தொடரில் நடிக்க அவர் ரூ.4 கோடி வரை சம்பளம் பெற்றுள்ளதாகக் கூறப்படுகிறது.
அடுத்து இன்னொரு வெப் தொடரில் நடிக்க சமந்தாவுக்கு ரூ.8 கோடி சம்பளம் கொடுக்க பேசி வருவதாகவும் தகவல் வெளியாகி உள்ளது. நடிகை சமந்தா, சினிமாவில் ஒரு படத்தில் நடிக்க அதிகபட்சமாக ரூ.1 கோடியே 50 லட்சம் வாங்கினார் என்பது குறிப்பிடத்தக்கது.

அதிக சம்பளம் காரணமாக நடிகைகள் பார்வை வெப் தொடர்கள் பக்கம் திரும்பி உள்ளது. ஏற்கனவே மீனா, காஜல் அகர்வால், நித்யா மேனன், ரம்யா கிருஷ்ணன், சோனியா அகர்வால் உள்ளிட்ட பலர் வெப் தொடர்களில் நடித்துள்ளனர். இந்த நிலையில் முன்னணி கதாநாயகிகளான திரிஷா, ஹன்சிகா, சுருதி ஹாசன், அனுஷ்கா ஆகியோரும் வெப் தொடர்களில் நடிக்க கதை கேட்டு வருவதாகக் கூறப்படுகிறது.
———————-
Reported by : Sisil.L

The post வெப் தொடர்களில் நடிக்க ஆர்வம் காட்டும் நடிகைகள் appeared first on Vanakkam News.