யாழ். போதனா வைத்தியசாலையில் ஒட்சிசன் தட்டுப்பாடு காணப்படுவதாக வைத்தியசாலையின் பதில் பணிப்பாளர் மருத்துவர் சண்முகநாதன் சிறிபவானந்தராஜா தெரிவித்துள்ளார். யாழ்.போதனா வைத்தியசாலையில் இன்று இடம்பெற்ற ஊடகவியலாளர் சந்திப்பிலேயே அவர் இவ்வாறு தெரிவித்துள்ளார். அவர் மேலும் தெரிவிக்கையில்,
“யாழ். போதனா வைத்தியசாலையில் நாளொன்றுக்கு 120 வரையான ஒட்சிசன் சிலிண்டர்கள் இதுவரை பாவிக்கப்பட்டு வந்தன. எனினும் தற்போது கொரோனா நோயாளர்களின் எண்ணிக்கை அதிகரித்ததன் காரணமாக குறித்த சிலிண்டர் பாவனை 180ற்கு மேல் அதிகரித்துள்ளது. ஒவ்வொரு நாளும் யாழ்ப்பாண போதனா வைத்தியசாலையிலிருந்து மூன்று தடவைகளுக்கு மேல் வாகனங்கள் அனுராதபுரம் சென்று சிலிண்டர்களைப் பெற்று வருகின்றன.
யாழ்ப்பாண குடாநாட்டில் கொரோனா தொற்றாளர்களின் எண்ணிக்கை படிப்படியாக அதிகரித்துள்ளதன் காரணமாக வைத்தியசாலை விடுதிகளில் கொரோனா நோயாளர்களின் எண்ணிக்கை அதிகரித்துள்ளது.
கோப்பாய் கொரோனா சிகிச்சை நிலையத்திலும் கொரோனா தொற்றாளர்கள் அதிகளவில் தங்க வைக்கப்பட்டுள்ளனர். எனவே தற்போதுள்ள நிலையில் மருத்துவ வளங்கள் அனைத்தும் கொரோனா தொற்றுக்குள்ளானோருக்கு பாவிக்கப்படுகின்றன.
தற்போதைய சூழ்நிலையில் தடுப்பூசி போடாதவர்கள் தான் அதிகமாக இறப்பை சந்திக்கின்றார்கள். எனவே பொதுமக்கள் அனைவரும் இந்தத் தடுப்பூசியைப் போடுவதன் மூலம் உயிரிழப்புகளிலிருந்து தம்மைக் காப்பாற்றிக்கொள்ள முடியும்.
அத்தோடு இனிமேல் வைத்தியசாலைக்கு வருவோர் தமக்குரிய தடுப்பூசி அட்டையைக் கொண்டு வருதல் மிக அவசியமான ஒன்றாகும். எனவே எதிர்வரும் காலத்தில் பொதுமக்கள் இந்தக் கொரோனா தொற்றிலிருந்து தம்மைப் பாதுகாப் பதற்கு உரிய வழிமுறைகளைக் கையாள வேண்டும். அத்தோடு அனைவரும் இந்த தடுப்பூசியைப் பெறுவதன் மூலம் இந்த தொற்றிலிருந்து தங்களைப் பாதுகாத்துக் கொள்ள முடியும்.
எனவே பொதுமக்கள் தற்போதுள்ள நிலையை அனுசரித்துச் செயற்படுவதன் மூலம் குறித்த தொற்றிலிருந்து தப்பித்துக்கொள்ள முடியும்” எனத் தெரிவித்துள்ளார்.
——————-
Reported by : Sisil.L—-
