பாகிஸ்தான் பொருளாதார நெருக்கடியில் சிக்கித் தவித்து வருகிறது. அங்கு மின்சாரப் பற்றாக்குறை கடுமையாக உள்ளது. இதனால் மின்சாரத்தை சேமிக்கவும், அதன் பயன்பாட்டைக் குறைக்கவும் அரசு நடவடிக்கை எடுத்து வருகிறது. அரசு அலுவலகங்களுக்கு சனிக்கிழமை விடுமுறை அளிக்க வலியுறுத்தப்பட்டிருக்கிறது.
இந்த நிலையில் பாகிஸ்தானில் மின்சாரப் பற்றாக்குறையை சமாளிக்க கட்டுப்பாடுகள் விதிக்கப்பட்டுள்ளன. தலைநகர் இஸ்லாமாபாத்தில் இரவு 10 மணிக்கு மேல் திருமண நிகழ்ச்சிகளை நடத்த தடை விதிக்கப்பட்டுள்ளது. மேலும் நாடு முழுவதும் இரவு 8.30 மணிக்கு அனைத்து சந்தைகளையும் மூட உத்தரவிடப்பட்டுள்ளது. பாகிஸ்தான் பிரதமர் ஷபாஸ் ஷெரீப் தலைமையில் அனைத்து மாகாண முதல்-மந்திரிகள் பங்கேற்ற கூட்டத்தில் இந்த முடிவுகள் எடுக்கப்பட்டன. இந்தத் தடை உத்தரவுகளை கடுமையாக அமுல்படுத்த இஸ்லாமாபாத் பொலிசார் மற்றும் அதிகாரிகளுக்கு உத்தரவிடப்பட்டுள்ளது. விதிகளை மீறுவோர் மீது கடும் நடவடிக்கை எடுக்க வலியுறுத்தப்பட்டுள்ளது.
மேலும் இஸ்லாமாபாத்தில் நடக்கும் திருமண விழாக்களில் ஒரே ஒரு உணவு வழங்க மட்டுமே அனுமதி வழங்கப்பட்டுள்ளது.
பாகிஸ்தானில் நாள் ஒன்றுக்கு 26 ஆயிரம் மெகா வோட் மின்சாரம் தேவை. ஆனால் 22 ஆயிரம் மெகாவோட் மின்சாரமே உற்பத்தி செய்யப்படுகிறது. 4 ஆயிரம் மெகாவோட் பற்றாக்குறை உள்ளது. வரும் நாட்களில் மின்சாரம் தட்டுப்பாடு மேலும் அதிகரிக்கும் என்று கூறப்படுகிறது.
Reported by:Anthonippillai.R
