அமெரிக்காவில் இருந்து விமானம் ஊடாக குஷ் போதைப்பொருள் கொண்டுவரப்பட்டமையுடன் தொடர்புடைய ஐவர் கைது செய்யப்பட்டுள்ளனர்.
மாளிகாவத்தை, அம்பலாங்கொடை, வெல்லம்பிட்டிய மற்றும் தெமட்டகொட பகுதிகளை சேர்ந்த 27, 36, 41, 47 மற்றும் 48 வயதான ஐவரே கைது செய்யப்பட்டுள்ளனர்.
கடந்த 20 ஆம் திகதி அமெரிக்காவிலிருந்து விமானம் ஊடாக நாட்டிற்கு கொண்டுவரப்பட்ட பொதியொன்றில் போதைப்பொருள் காணப்படுவதாக சுங்க போதைப்பொருள் தடுப்பு பிரிவினருக்கு கிடைத்த தகவலுக்கமைய பொலிஸ் போதைப்பொருள் ஒழிப்பு பிரிவினரால் விசாரணைகள் ஆரம்பிக்கப்பட்டன.
குறித்த பொதி கம்பஹாவை சேர்ந்த பெண் ஒருவருக்கு அனுப்பப்பட்டிருந்தது.
அதில் 05 கிலோ 61 கிராம் குஷ் போதைப்பொருளும் 511 கிராம் கொக்கெய்னும் கண்டுபிடிக்கப்பட்டன.
பொதியை பெற்றுக்கொள்ள வந்தவர் கைது செய்யப்பட்டு, அவரிடம் முன்னெடுக்கப்பட்ட விசாரணைகளையடுத்து மேலும் ஐவர் கைது செய்யப்பட்டுள்ளனர்.
போதைப்பொருள் கடத்தலுக்காக பயன்படுத்தப்பட்ட கெப் ரக வாகனமும் கைப்பற்றப்பட்டுள்ளதாக பொலிஸார் தெரிவித்தனர்.
சந்தேகநபர்கள், 07 நாட்கள் தடுத்துவைக்கப்பட்டுள்ளதுடன், பொலிஸ் போதைப்பொருள் தடுப்பு பிரிவினரால் மேலதிக விசாரணைகள் முன்னெடுக்கப்பட்டுள்ளன.
Reported by:S.Kumara
